Man City ​ត្រៀម​ចំណាយ​២០០​លាន​ផោន​នៅ​រដូវក្តៅ​ តាម​ប្រមាញ់ Kingsley Coman

 ​ក្លឹប Man City បាន​ផ្តោត​គោលដៅ​លើ​ខ្សែបម្រើ​វ័យក្មេង​របស់​បារាំង​គឺ​កីឡាករ Kingsley Coman ដើម្បី​ធ្វើជា​ផ្នែក​មួយ​នៃ​ការកសាង​ក្រុម​ជាមួយនឹង​ទឹកប្រាក់​ត្រូវ​ចំណាយ​នៅ​រដូវក្តៅ​២០០​លាន​ផោន​។​

​    ​លោក Pep Guardiola គ្រូបង្វឹក Man City បាន​នាំយក Coman ពី​ក្លឹប Juventus ទៅ​ក្លឹប Bayern Munich ជាមួយ​កិច្ចសន្យាខ្ចី​ជើង​រយៈពេល​វែង​កាលពីដើម​រដូវ​កាល​មុន ហើយ​ចង់​ជួបជុំ​ជាមួយ​កីឡាករ​វ័យ​២០​ឆ្នាំ​ឡើងវិញ​។​

​    ​ក្លឹប Bayern មាន​ជម្រើស​ចុះ​កិច្ចព្រមព្រៀង​ផ្ទេរ Coman ជា​អចិន្ត្រៃយ៍ ប៉ុន្តែ​គេ​ជឿថា លោក Carlo Ancelotti មិន​ទំនងជា​សម្រេច​លក្ខខណ្ឌ​នេះ​ទេ​។​

​    ​ចំណុច​នេះ​បាន​ផ្តល់ឱកាស​ឲ្យ​ក្លឹប Man City ហើយ​ប្រភព​ជាច្រើន​នៅ​បារាំង​លើកឡើងថា ពួកគេ​ត្រៀមខ្លួន​រួចរាល់ ដើម្បី​ចំណាយ​ប្រហែល​៤០​លាន​ផោន ដើម្បី​ទទួលបាន Coman មុន​គូប្រជែង​ដទៃទៀត​នៅ​អឺរ៉ុប​។​

​    ​លោក Guardiola ទំនងជា​ចង់​បន្ថែម Coman ទៅក្នុង​តំបន់​ប្រយុទ្ធ​ដែលមាន​កីឡាករ​វ័យក្មេង​ដូចជា Leroy Sane, Rahemm Sterling និង Gabriel Jesus ដែល​នឹង​បង្កើត​ទម្រង់​ប្រយុទ្ធ​ដ៏​ជក់ចិត្ត​មួយ​ក្នុងចំណោម​ទម្រង់​លេង​ដ៏​ជក់ចិត្ត​បំផុត​ក្នុង​វិស័យ​បាល់ទាត់​អឺរ៉ុប​៕